SPALDING Court by HOOP7
有無諗過係日本打波？如果搵唔到街場、又無日本朋友去幫手 book 公營球場，咁又可以去邊度？
日本當地其實有唔少私營運動中心，比較大型連鎖集團有 ROUND 1，不過某部分俾人感覺好似遊樂場。不過有偉大 Google ，無乜嘢係搵唔到嘅～上星期俾我搵到係大阪荒本駅隔離其中一間私營 SPALDING Court ，裡面就純粹籃球，我決定一條毒L 走入去try try。
依個 SPALDING Court 由 HOOP7 共同辦理，裡面當然有 SPALDING 籃球租借 & 賣；第一次踏入去，其實好有日式道場感覺，我指真係好似睇漫畫裡面「武術道館、道場」一種，有個簡單 reception 放滿獎座、球隊標語，另外有自家球隊比賽相，一幅簡單告示牌貼上幾份練習班介紹、活動等等。喺入去打波之前首先要交入場費，非會員成人一位盛惠 ¥550 （含稅）/ 30 分鐘 ，每件租用物品逐一收費👀
入到球場內其實一眼睇曬，有兩個正規籃球場、細場四個，有一間 Gym 房；而細場主要為小朋友而設，所以每個籃球架係矮少少，其餘格式同唔少外國、內地校內球場相似。SPALDING Court 最抵死係佢個開放時間，平日只會係下午4點後先開門，收工一般 1:00am – 3:00am，而佢地星期六日先會開朝早。日本人均收工時間基本過夜晚8-9點，依類私營球場就可以乎合民眾需求，所以營業時間比較夜，同時亦係佢地特色之一；而 SPALDING Court 另一特色係會定期搞 Pick-Up games，有 3on3 、 4on4 、男子組、女子組，提供一個籃球交流活動，可以吸引其他地區民眾、遊客參與。
對於我哋係香港，好容易就搵到一個街場，籃球交流活動隨時可以；但去到其他國家，唔係咁輕易就可以接觸到團體運動。
以後如果有人問11點後係日本可以做咩，我可以答佢：不如去打場波～
