【吹咩 · 求證】睇到、睇唔到

「天下武功,唯快不破」。 其實現今籃球比賽嘅節奏都越來越快,球証有時睇漏嘢都好正常,例如走步、打手等等,但我見到就一定要吹,而我一直都拎住呢個宗旨做球証,但現時某啲聯賽球証對球例嘅理解又真係差啲,希望佢地可以補吓習嘅同時,令到打緊比賽嘅球員都可以更明白球例。


一個經常出現嘅實例:

就好似比賽仲剩廿幾秒、時間好短,A隊領先兩分,但係team foul滿,而家A隊有一個罰球,罰球出手射唔入,雙方籃底球員好緊張,互相搶位時動作過大,球証吹雙方犯規; 之後由於A隊team foul滿所以B隊射罰球,第一球入第二球唔入,咁呢球籃板梗係更加博命嫁啦!  籃板大家搶唔到,個波跌喺地下,A隊球員成個人訓落去攬住個波,B隊球員梗係衝去搶,其中一位B隊球員紮行馬雙手揸住個波一拉,連埋訓係到個人拉前咗少少,B隊啲人即刻叫 「走步呀!」 然後球証話「我睇到,走步。」,之後B隊開波最後結果? 唔重要啦⋯⋯

「時間短、動作快」唔代表睇唔到就唔吹,但睇到又唔吹? 其實成以上實例真係錯得好_過分,大家就咁估又發現咗幾多個問題呢?


首先以上情況最後幾十秒,雙方犯規係唔會有罰球射 (以上情況B隊真心要多謝球証同A隊朋友無任何反應,輸緊有罰球射……)。 第二就梗係走步,其實有個情況成日都會俾人誤會,就係當個球員訓係地既時候而繼續拍住個波又或者好定咁hold住個波,只要個人有少少郁就會吹走步。

但其實就算你個人訓係地,只要你個動作仍然係拍緊波,就繼續係有效運球,更何況上面個情況! 走步定義:例書25條 (太長講唔晒住), 25.2.3入面清楚講到:

「球員跌倒在地面上並滑動、躺在、或坐在地面上控制球,這是合法的。若球員持球滾動、或試圖持球站立,均屬違例。」

– 簡單咁講,係正式由你開始控制到個波既情況,先可以有走步既出現,咁即係如果爭持球情況下,係唔會吹走步!

講完兩個錯判,咁點判先岩?大家可以討論下,下期先開估。


我哋做球証,成日會聽到球員或者教練都會問:「吹咩球証」同「做咩唔吹XXX」,當然好多有經驗既教練,梗係扮哂野明知都會係到問長問短,心理戰嘛! 所以通常係比賽中,我都會選擇唔答教練或者領隊(有時佢地都比較寸)。不過,好多時球員如果平心靜氣咁問,我都會係有限既時間內簡單咁解釋。(本人其實好明白球場上唔同角色有唔同既野做,因為本人同時係一位球証又有做球員同領隊。)


P.S. 回應返上次有提問關於出拳,出拳就梗係違例啦,你估打排球咩! 例書13.2 寫得好清楚:「球員不得持球走、故意踢球、以腿的任何部位擋球、或以拳擊球。」

Leave a Reply

Your email address will not be published.