SEOUL OG SNEAKERS GALLERY BAR

喺首爾、有位鍾意收藏 Sneakers 嘅調酒師 ,因為有太多收藏唔知點做,準備搵間迷你貨倉或者換間大少少嘅屋存放。有一日,佢請咗幾位朋友上去幫手整理下屋企嘅珍藏,其中有朋友問:
「點解唔去嘗試將您啲珍藏借出去展示俾其他人睇?」
但依位收藏家就擔心假如隨便展示會影響寶物嘅顔色、質料等…… 之後再有位朋友講:「放去您工作酒吧咪可以解決存放問題……」
期後佢自己一個人坐係屋企、攞住酒杯🍸,諗起同幾位朋友對話,反問自己:「Sneakers 可唔可以同酒吧結合?」
從此 OG SNEAKERS GALLERY BAR 誕生~

OG SNEAKERS GALLERY BAR 店主 – Mr. Choi Moon Kyu,佢希望每一日可以係工作期間望到自己珍藏、同時又可以展示俾客人睇,決定為店內親自設計所有佈置、裝飾及燈光,務求將所有珍藏品好似畫廊一樣展現俾大家睇。佢所儲嘅 Sneakers 主要為原版 NIKE 鞋,部分仲年紀大過佢,而係咁多珍藏當中包括有經典海報、相關副産品等等,真係每一個角落都會發現珍寶;至於店主 Moon 最滿意、又最鍾意係佢幅鞋牆壁畫,每一個月都會轉一個主題;可能會問邊有咁多鞋每月換畫?Moon 佢自己話得700-800對珍藏覺得唔係好夠,所以佢有時間就上 eBay 搵「新貨」~ 不過一定要OG

 

假如您去到首爾都想走去參觀下,又或者同朋友一邊飲嘢、一邊欣賞佢嘅珍藏,可以去以下地址:
2/F, 736-15, Itaewon-ro ,Yongsan-gu, Seoul
(梨泰院站 2號出口直行5分鐘)

大概 2017 年尾,係 Instagram look look 下、無意中發現 OG Bar,店內鞋牆完全吸引咗我,間中睇到佢地相、心諗有機會要去參觀;一年後終於有機會去見識下。

店主 Moon 只係單純鍾意儲鞋,無太多考慮,佢用自己方法式將興趣分享俾大家睇,其實真係好難得,每一個月佢會為鞋牆安排一個特別主題,暫時為止未見有重複,單單依一個想法已經令人佩服。
當日見佢其實都準備咗好多問題想問,好似佢最鍾意邊款鞋(佢即時揾對AF1),但反而我同佢傾咗最多非鞋類相關問題,例如咩類型客人會上OG Bar 、去韓國邊度滑雪最好、韓國女仔其實係點、店主點解由讀設計轉到做調酒師等等,真係同佢傾咗好多嘢,佢甚至講俾我知見到身邊朋友一個二個結曬婚、自己都想有家庭 …… 無諗過同一位第一次見嘅人可以有咁多話題,老實講、比起一啲相識好耐、但永遠喺唔同人面前有唔同樣嘅所謂朋友,感覺真係好好多。
也許、興趣可以係一種共同語言,只要您係真心熱愛您們嘅喜好。

…… 感謝店主款待、仲請我食飯,下年去滑雪再搵你吹水~

Leave a Reply

Your email address will not be published.